Home Empfehlen Suchen Kontakt Drucken Sitemap
gebore im Herbschtmonet 1953 uf em Cheischtehubel, im Eggiwil
ufgwachse und d Schuel bsuecht o ds Eggiwil
dernah e Lehr als Saager inere grosse Saagerei z Äschlismatt
drufabe d Regrutteschuel bi de Train ds Andermatt (är het's im Louf vo de Jahr bis zum Gfreite bbracht)
nächer es Faschwälschlandjahr im Fryburgische (me het halt dört no e Art Dütsch gredt)
u grad no einisch e Ufenthalt i dr Frömdi (Saagerei z Oberhallau) Jaja, dr Aschi isch fey chly i dr Wält umecho!
nächer het er im Eggiwil e chlyni Saagerei ufta (drum het er gäng öppe es Brätt vor em Gring)
dernäbe bewirtschaftet er ds chlyne Heimetli, won er vom Vater übernoh het (3 Chueli, 5 Guschti, im Momänt grad drü Chälbli, zwo Söi, dervo e Moore wo grad gfäärlet het, es paar Hüehner und es Traktorli)
scho syt 22 Jahr ghürate mit dr Kathrin (Käthle), chinderlos
weis natürlech über alles beschtens Bscheid und het drum e Stammplatz a allne Stammtische.
referiert gfragt und ungfragt über Politik, Sport, Kultur, Wirtschaft und überhoupt über ds Läbe
nidemal d Mikrofon vom Radio Ämme sy vor ihm sicher
und wehe me fragt ne! Dä chunnt also grad sofort und laveret a jedem Fescht oder Firmeaalass.
Dä schnurrti sogar uf em Rütli oder Bundesplatz, wenn me ne liess
